په افغانستان کې د قطر د سفارت پخوانی، شارژدافیر مردف القاشوطي، په کابل کې د نوي سفیر په توګه د خپل باورلیک نسخه د بهرنیو چارو وزیر مولوي امیرخان متقی ته وړاندې کړه.
د بهرنیو چارو وزارت وایي، ښاغلي متقي د قطر دولت نوي سفیر ته په نوي ماموریت کې د بریا هیله کړې او هيله يې څرګنده کړې چې د دواړو هېوادونو ترمنځ په ګڼو برخو کې له شته فرصتونو ښه ګټه پورته شي او اړيکې لا پراخې شي.
مولوي امیر خان متقي د افغانستان او قطر اړيکې تاريخي بللي او ټينګار يې کړی چې د سوداګرۍ د پراختيا ترڅنګ قطر ته د افغان کاري ظرفيت د استولو لړۍ چټکه شي.
له بل لوري کابل کې د قطر نوي سفیر، ژمنه کړې چې د کابل او دوحې د اړیکو د پياوړتيا په برخه کې به هڅې زياتې کړي.
مردف القاشوطي ټينګار کړی چې هېواد به يې د منځګړيتوب په برخه کې خپل سياست ته ادامه ورکړي او د افغانستان او نړيوالې ټولنې د دريځونو په لا نږدې کولو کې به هڅې وکړي.