د کلیو بیارغونې او پراختیا وزارت وايي، د پکتیا په ډنډ پټان او وزي ځدراڼ ولسوالیو کې د ۴ مېلیونه افغانیو په لگښت د اوبو ۲ کانالونه جوړ او گټې اخیستنې ته وسپارل شول.
له یاد وزارت څخه په خپره شوې خبرپاڼه کې ویل شوي، یاد کانالونه هر یو په ترتیب سره د ۴۲ مترو په اوږدوالي او ۱،۹ متره په لوړوالي سره او د ۱۰۸ مترو په اوږدوالي او ۳ مترو په لوړوالي سره د کلیو بیارغونې او پراختیا وزارت له لوري جوړ شوي دي.
په خبرپاڼه کې ویل شوي، د یادو کانالونو په جوړېدو سره به د سیمې سلگونه جریبه کرنیزه ځمکه خړوبه شي او هم به د اوبو د ضایع کېدو مخه ونیول شي.
د یو بل خبر له مخې، د اوبو او انرژۍ وزارت له لوري د پکتیا د سید کرم ولسوالۍ اړوند د بره غوریزي چیکډیم تخنیکي سروې شوې او د سیمې توپوگرافي، هایدرولوژيکي، جیولوژيکي او ټولنیز ارقام هم را ټول شوي دي.
د یاد چیکډیم په جوړېدو سره به د سیمې د ځمکې لاندې اوبه تغذیه، ۲۰۰ جریبه کرنیزه ځمکه خړوبه او د سېلابونو له گواښ څخه به خوندي شي.
د اوبو او انرژۍ وزارت له لوري اوسمهال د هېواد په گوټ ـ گوټ کې سلگونه چیکډیمونو د جوړېدو چارې روانې دي، چې یو شمېر به یې په نږدې راتلونکې بشپړ شي.