د پکتیا ولایت د مخابراتو او معلوماتي ټکنالوژۍ ریاست د ځاځي اریوب ولسوالۍ اړوند منډهېر سیمه کې یو شمېر هغه مخابراتي دستګاوې کشف او ضبط کړي، چې په غیر قانوني ډول نصب شوې وې.
د مخابراتو او معلوماتي ټېکنالوجۍ وزارت ویاند عنایت الله الکوزی وايي، چې هېواد کې د هر ډول غیر مجازو وسایلو او فریکونسي فعالیتونو مخنیوی کېږي او بې اجازې مخابراتي فعالیت قانوني تعقیب لري.
ښاغلی الکوزی زیاتوي، چې ټول هغه وسایل او تجهیزات چې د مخابراتو او معلوماتي ټکنالوجۍ وزارت څخه په رسمي ډول جواز ونه لري او د فعالیت په موخه ورڅخه استفاده وشي، غیر قانوني شمېرل کېږي.
د نوموړي په وینا، پر هېواد د سرپرست حکومت له بیا واکمنېدو راپه دېخوا هېواد کې د مخابراتي خدمتونو په برخه کې د هر ډول غیر قانوني تجهیزاتو او غیر مجاز فعالیتونو مخنیوی شوی او د فریکونسیو د اخلال د مخنیوي، کنټرول او مدیریت لپاره هم یو مجهز او پرمختللی سیسټم جوړ شوی چې د هر راز غیر قانوني فریکونسيو پیژندنه او مخنیوی کوي.