د راپورونو پر اساس د خیبر پښتونخوا د پېښور اړوند “بورډ” بازار کې په یوه چاودنې کې ۳ تنه وژل شوي او یو تن ټپی دی.
د خیبر روغتون مسولینو د پېښې په اړه رسنیو ته ویلي، چې یاد روغتون ته یو تن مړ او بل تن چې سخت ټپي و، راوړل شوي دي.
نوموړي زیاته کړې، چې چاودنه په بورډ بازار کې د ناصر باغ پولیسو یوې پوستې ته نږدې شوې ده.
د رسنیو د راپورونو پر اساس ویل کیږي، چې تر چاودنې وروسته پولیسو سیمه کلابنده کړې وه او پلټنې یې پیل کړي دي.
رسنیو د پولیسو په حواله ویلي، وژل شوي درې واړه اشخاص وسله وال و او زیاته کړې یې ده، چې ولسي وګړو ته پکې مرګ ژوبله نه ده رسېدلې.
په سیمه کې د پولیسو یوه مشر “کاشف افتاب عباسي” رسنیو ته په خبرو کې ویلي، چې چاودېدونکي توکي په موټرسایکل کې ځای پر ځای شوي و.
هغه زیاته کړې، چې دا پېښه د چاودېدونکو توکو د لېږد پر مهال رامنځته شوې ده.
نوموړي ويلي، چې چاودنه کې ولسي وګړو ته مرګ ژوبله نده رسیدلې او خپله د چاودېدونکو توکو لېږدونکي پکې وژل شویدي.
پاکستاني رسنیو بیا راپورونه خپاره کړي، چې د چاودیدونکو توکو لیږدونکي پېژندل شوي او ویل کېږي چې ټول د پېښور اوسیدونکي و.
د یادونې وړ ده، چې په پښتونخوا کې د تحریک انصاف ګوند په مشرۍ د نوي حکومت له جوړېدو وروسته دا په پېښور کې لومړنۍ چاودنه ده.