د خوست مرستیال والي مولوي محبوب شاه قانت د جلغوزیو مارکېټ څخه د لیدنې پر مهال د یو شمېر چنایي سوداګرو سره لیدنه وکړه؛ په یاده لیدنه کې چنایي سوداګرو ته د خوست مرستیال والي مولوي محبوب شاه قانت ډاډ ورکړ چې افغانستان یو امن هېواد دی، چې دلته د هر داخلي او بهرني سوداګر سر او مال خوندي دی او په ډاډه زړه تجارتي چارې پر مخ وړلی شي.
چینایي سوداګرو د خوست له مرستیال والي مولوي محبوب شاه قانت څخه مننه وکړه، چې دوی ته یې د امنیت او همکارۍ ډاډ ورکړ او دغه راز یې زیاته کړه چې دوی درک کړې چې افغانستان یو امن هېواد دی او دوی د خوندیتوب احساس کوي.
چینایي سوداګرو وویل: دوی په پلان کې لري چې د افغانستان په مرکز او ځینو جنوبي ولایتونو کې د جلغوزیو د پروسس کارخونې جوړې کړي، چې ورسره به ډېرو خلکو ته د کار زمینه برابره شي.
هېره دې نه وي چې د افغانستان جلغوزي په چین کې د پراخ بازار درلودونکي دي او نږدې ۸۰ سلنه ترلاسه کېدونکي جلغوزي دغه هېواد ته صادرېږي.
په هېواد کې د اسلامي امارت له بیا ځل واکمنېدو وروسته ډاډمنې امنیتي فضا بهرنیو او کورنیو سوداګرو ته د پراخه پانګه اچونې زمینه برابره کړې ده.