کابل ښاروالي وايي، د بشپړ ښاري نظم رامنځته کولو په موخه د درېیمې ناحیې د مسوولینو له لوري د عملیاتي پلان په پلي کولو کې سره د یادې ناحیې د اړوند سیمو په سړکونو او پلو لارو کې خنډونه پاک او ویجاړل شول.
له کابل ښاروالۍ څخه په خپره شوې خبرپاڼه کې ویل شوي، په دې عملیاتو کې په هغه پلو لارو کې چې، د پارکېنگ گټه ترې پورته کېده مخنیوی وشو او سرغړوونکي له تادیب او سپارښتنو سره مخ شول.: «په همدې توگه د سوداگریزو ودانیو پر مالکانو او اصنافو ټینگار وشو چې د ښاري نظم رامنځته کېدو او د گڼهگوڼې د کمښت په موخه هر څه ژر د خپلو ودانیو له لاندني پوړ څخه د وسایطو درولو په موخه کار واخلي او یا هم کومه بله بدیله لاره و سنجوي؛ له دې پرته به له قانوني چلند سره مخ شي چې بیا د شکایت حق نه لري.»
د خبرپاڼې له مخې، په سوداگریزو او لوړ پوړیزو ودانیو کې د وسایطو د پارکېنگ نشتون او سړکونو او واټونو کې د موټر درولو په موخه گټه اخیستنه د ښاري بې نظمۍ او گڼهگوڼې سبب شوې ده، چې په دې عملیاتو کې ښاري عامه سیمې بېرته تر لاسه او د ټولو ښاریانو په واک کې ورکړل شوې. :«کابل ښاروالي د قانون حاکمیت او د بشپړ ښاري نظم رامنځته کولو په برخو کې قوي هوډ او ژمنتیا لري.»
د یو بل خبر له مخې، د کابل ښاروالۍ له لوري د ملگرو ملتونو د پروژوې خدمتونو د دفتر په مرسته د اوولسمې ناحیې د ۴۱م گذر اړوند د نجات مېنې ښارگوټي د کوڅو جوړولو چارې روانې دي.
دا کوڅې په ټولیزه توگه ۶۶۶ متره اوږدوالی او ۶ متره سور لري چې تر دې دمه یې چارې ۴۰ سلنه مخته تللې دي او د ټاکل شوې ده تر راتلونکې یوې میاشتې پورې په بنسټیزه توگه بشپړې شي.