د کابل ښاروالۍ کلتوري رييس د کابل ښار په شهرنو پارک کې د اقرا تر نامه لاندې د نندارتون د پرانيستې په مراسمو کې د کابل ښار په پارکونو کې د کتاب پلورنځيو او عامه کتابتونونو د جوړېدو خبر ورکړی.
د کابل ښاروالۍ کلتوري رییس، ولي ګل جواد وايي د کابل ښاروالۍ یوه ژمنه، او پلان دا دی چې د کابل ښار په پارکونو کې کتابتونونه جوړ کړي.
د ښاغلي جواد په وينا د کتابتونونو د جوړولو کار عملاً د کابل ښار په درييمې ناحيې علاوالدين پارک کې روان ده، او زياتوي چې په پارکونو او عامه ځايونو کې د کتابتونو له جوړولو یې موخه د ځوانانو ترمنځ د مطالعې دود پياوړي کول دي.
داقراء په نوم د کتابونو ياد نندارتون د کابل ښاروالۍ د کلتوري څانګې په همکارۍ د یوه خصوصي شرکت لخوا د کابل ښار په شهرنو پارک کې پرانیستل شو، او د نندارتون د جوړوونکو په وینا، په دغه درې ورځني نندارتون کې د اروا پوهنې، ناولونو، تفسیر او قرآن کریم په ګډون د بېلابېلو څانګو ۳۰۰۰ کتابونه نندارې ته اېښودل شوي دي.