کارپوهان: دوحې غونډه کې نه ګډون د طالبانو خپلواکي او له استعمار او بلواکۍ د افغانستان خلاصون ښیي

د قطر پلازمېنې دوحه کې د افغانستان په تړاو د ملګرو ملتونو په مشرۍ د پېل شوې غونډې نن دویمه او وروستۍ ورځ ده.که څه هم افغان حکومت ته دغې غونډه کې د ګډون بلنه ورکړل شوې وه، خو افغان حکومت خپل ګډون مشروط کړ.د افغان حکومت یو شرط د افغانستان استازیتوب او د ملګرو ملتونو له مشرتابه سره خبرې کول و، خو دواړه شرطونه یې و نه منل شول. په دې اساس افغان حکومت په غونډه کې ګډون رد کړ.د مخکني حکومت یو شمېر چارواکي او کارپوهان دا کار د افغان حکومت لوی او زړور ګام بولي او وایي، افغان حکومت نړۍ ته وښودله چې خپلواکې پرېکړې کولی او د چا تر اغېز لاندې نه راځي.د مخکني حکومت پر مهال په ولسي جرګه کې د ننګرهار د خلکو استازی عبدالظاهر قدیر وایي “نن چې په داسې حساسو شرایطو کې د طالبانو دا ډول غوڅ او خپلواک دریځ وینم، د استعمار او بلواکۍ له لومو څخه د افغانستان وتل راته یقیني ښکاري.”قدیر ویلي چې د تېر حکومت مشران د امریکا تر مستقیم واک لاندې وو.دغه راز، د چارو کار پوه حمیدالله هوتک وایي، مخکې به د افغانستان هره کوچنۍ او لویه پرېکړه امریکا کوله، خو اوس پرېکړې افغانان کوي.هوتک ویلي “ازادي تر ټولو لوی نعمت دی.”یو شمېر عامو افغانانو هم له هندوکش غږ سره خبرو کې د افغان حکومت دغه خپلواکه ګام او د افغانستان ګټو ته په کتلو د حکومت دغه کړنه ستایلې او خوښي یې ښودلې چې له لسیزو وروسته افغانستان کې یو خپلواک حکومت له ریښتیني خپلواکۍ لرلو سره رامنځته شوی دی.