کاناډايي چارواکي وايي، روان زېږدیز کال له افغانستان سره خپلې هغه پراختیايي مرستې بیا پیلوي، چې له تېرو دوو کلونو راهیسې ودرېدلې دي.
د نړیوالو رسنیو د راپورونو پر بنسټ، د ۲۰۲۳ز کال د جون په میاشت کې د کاناډا پارلمان له حکومت غوښتنه وکړه، چې له افغانستان سره خپلې بشري مرستې بیا پیل کړي.
هغه وخت د کاناډا حکومت ویلي وو، چې له افغانستان سره د بشري مرستو لایحه یې حکومت تصویب کړې ده او له افغانستان سره به خپلې بشري مرستې پیل کړي.
په افغانستان کې د طبیعي پېښو، له پاکستان او ایران څخه د جبري کډوالو راستنېدل او گڼو نورو لاملونو له مخې گڼ افغانان بشري مرستو ته اړ شوي دي.
د افغانستان اسلامي امارت د بیا واکمنۍ راهیسې گڼو نړیوالو بنسټونو په افغانستان کې خپل فعالیتونه وځنډول، خو په افغانستان کې لا هم گڼ نړیوال بنسټونه کار کوي او اړمنو خلکو ته هره میاشت بشري مرستې ورکوي.
د ملگرو ملتونو د خوړو نړیوال پروگرام هم ویلي، چې نړیواله ټولنه باید اړمن افغانان هېر نه کړي او خپلې مرستې ورسره روانې وساتي.