د کانونو او پټرولیم وزارت وايي، د مالگې واردول په بشپړ ډول منع دي او هېڅ ډول مالگه اوسمهال نه واردېږي.
له یاد وزارت څخه په خپره شوې خبرپاڼه کې ویل شوي، د مالگې د کانونو قراردادیانو، د مالگې د کارخونو خاوندوانو او د مالگې اتحادیې غړو د کانونو او پټرولیم، د مالیې، صنعت او سوداگرۍ وزارتونو او د خوړو او درملو ملي ادارې له استازو سره لیدلي دي.
په خبرپاڼه کې ویل شوي، دغه ناسته د وارداتي مالگې د بندولو، د مالگې د کارخونو او تولیداتو د معیاري کولو، پر وخت د مالگې رسولو او په بازار کې د مالگې د کمښت د مخنیوي په موخه جوړه شوې وه.:« د مالگې واردول په بشپړ ډول منع دي، د مالگې د کارخونو قراردادیان او مالکین دې د دې زرین فرصت په ارزښت پوه شي او په پوره ایماندارۍ او صداقت سره دې مالگه استخراج، پروسس او تولید کړي او د هېواد بازارونو ته دې وړاندې کړي.»
پرو سږکال افغان حکومت د مالگې پر واردولو بندیز ولگاوه، چې ورسره په هېواد کې د مالگې کانونو ته د پانگهوالو پام واوښت او اوسمهال په هېواد کې کارېدونکې مالگه د هېواد خپل تولید دی.