په کندوز کې یوې امنیتي سرچینې «هندوکش غږ» ته ویلي، چې نن یې د کندوز په مرکز کې د بغاوتګرو د یوې نوې ډلې یو فعال غړی نیولی دی.
د یادې سرچینې په خبره، نن یې د کندوز د مرکز اړوند د «پیوند قلبها» هوټل ته نږدې محمد حکیم د محمد کریم زوی نیولی، چې اصلاً د بغلان د پلحصار ولسوالۍ اوسېدونکی دی.
د سرچینې د معلوماتو پر بنسټ، نیول شوی تن د یوې نوې جوړې شوې ډلې (اقتدار مردمي) فعال غړی دی او دوه حلقې چسپکي ماینونه ورسره نیول شوي دي.:«د دې ډلې مشري ډاکټر نسیم کوي. نوموړی په پخواني حکومت کې د ولسي جرگې غړی و او اوس په بهر کې مېشت دی.»
د سرچینې په خبره، یاد تن د کندوز ولایت د استخباراتو له لوري نیول شوی او پر خپل جرم یې اعتراف هم کړی، چې د دوسیې تر بشپړېدو وروسته به عدلي ـ قضايي ارگانونو ته وسپارل شي.
پر افغانستان د طالبانو د بیا واکمنۍ راهیسې په بېلابېلو نومونو جبهې جوړې شوي دي، چې گڼ غړي یې نیول شوي او یا هم وژل شوي دي.
نږدې لس ورځې وړاندې د کندوز په څنگ لوري ولایت بغلان کې د بغاوت ډلې دوه مهم قومندانان عبدالصمد مشهور په حمزه کوهگدای او خیرالله په نوم دوه غړي وژل شوي وو.
یادو بغاوتیانو د تېر لوی اختر په درېیمه ورځ د یو ویډیويي کلیپ له لارې خپل موجودیت اعلان کړی وو او غوښتل یې چې عامه نظم اخلال او ګډ وډ کړي.
افغان امنیتي ځواکونه هېوادوالو ته ډاډ ورکوي، چې هغه ډلې به سر پورته کولو ته پرې نهږدي چې عامه نظم اخلالوي.