کورنیو چارو وزارت خبر ورکړی، چې د غزني امنیه قومندانۍ د تروريزم پر وړاندې د مبارزې مدیریت د وروستیو څلورو میاشتو په موده کې د غزني ښار او ولسوالیو په بېلابېلو سیمو کې ګڼ شمېر وسلې او پوځي تجهیزات نیولي دي.
د وزارت د خبرپاڼې لهمخې، په دغو وسلو او مهماتو کې ۲۱ میله کلاشینکوفونه، ۲۱ تومانچې، اته ښکاري ټوپکونه، دوه میله پيکا او د سپکو او درنو وسلو مرمۍ او یو شمېر نور نظامي مهمات شامل دي.
خبرپاڼه زیاتوي، په دغو عملیاتو کې ۱۱ تنه شکمن کسان هم نیول شوي او عدلي او قضايي ارګانونو ته سپارل شوي دي.