د پروان ولایت امنیې قومندانۍ امنیتي ځواکونو د کشفي معلوماتو پر بنسټ، د سرخ پارسا ولسوالۍ اړوند لولنج سیمه کې د وسلو او مهماتو یوه لویه زېرمه کشف کړې ده.
کورنیو چارو وزارت وایي، امنیتي ځواکونو له یادې زیرمې څخه لسګونه میله بېلابېلې وسلې او سلګونه فیره مرمۍ ترلاسه کړي دي.
د یاد وزارت په وینا، په تر لاسه شویو وسلو او مهماتو کې یو میل پیکا، دهشکه، کرینکوف، څلور میله کلاشینکوفونه، کلهکوف، یو میل M4، یو میل M40، یو میل M49، درې میله توپانچې، یو نارنجک ویشتونکی، ۱۶ کړۍ لاسي بمونه، ۴۴ شاجورونه، پنځه صندوقه د پیکا مرمۍ، ۳۵ د نارنجک ویشتونکي مرمۍ، ۱۲ د راکټ مرمۍ، ۵۰ دانې د ماینونو پټاقۍ، درې سولرې، پروجکټورونه او نور توکي شامل دي.
وزارت زیاته کړې، چې په دې تړاو یو شکمن کس نیول شوی او ترلاسه شوي وسلې د امنیه قومندانۍ مسؤلینو ته سپارل شوې دي.