د افغانستان د اوبو او انرژۍ وزارت وايي، د یاد وزارت چارسمبالي وزیر ملا عبدالطیف منصور په افغانستان کې د یونیسیف له عمومي مشر ډاکټر تاجالدین سره لیدلي او د اوبو او انرژۍ پروژو په پلې کولو په اړه یې په دوه اړخیزو همکاریو یې خبرې کړې دي.
له یاد وزارت څخه په خپره شوې خبرپاڼه کې ویل شوي، په دې لیدنه کې د اقلیمي بدلونونو اغېزو او په افغانستان کې د اوبو د مدیریت په برخه کې له یونیسیف څخه د همکارۍ غوښتنه شوې.: «هېواد په لرو پرتو ولایتونو کې د څښاک اوبو د برابرولو پروژو، له پنجشېر څخه کابل ته د اوبو د لېږد پروژې، د تخنیکي تجهیزاتو د برابرولو او د انجنیرانو د وړتیا د لوړولو په برخه کې له یونیسیف څخه د همکارۍ غوښتنه وشوه.»
په افغانستان کې د یونیسیف موسسې عمومي مشر هم ویلي، چې د اوبو پروژو پلي کول د دغې موسسې په لومړیتوبونو کې ځای لري او یونیسیف په پام کې لري، چې په افغانستان کې د ځمکې لاندې اوبو د پیاوړتیا، د اوبو سرچینو د مدیریت او د څښاک صحي اوبو د برابرولو په برخه کې کار وکړي.:«دغه موسسه به له دې وروسته په افغانستان کې د انرژي د پراختیا په برخه کې هم فعالیت وکړي.»
د یو بل خبر له مخې، په کونړ کې د قمچي ناو چیکډیم د جوړولو چارې ۹۲ سلنه بشپړې شوې دي.
یاد چیکډیم د اوبو او انرژۍ وزارت په مالي لگښت د کونړ سندیزې حوزې تر څارنې لاندې جوړېږي، چې اوسمهال یې ۹۲ سلنه چارې بشپړې شوې دي او په نږدې وختونو کې به پرانیستل شي.
یاد چیکیډیم د کونړ په وټهپور ولسوالۍ کې جوړېږي، چې له جوړېدو سره به زرگونه بزگرانو ته اوبه برابرې کړي.