د بدخشان د اطلاعاتو او کلتور ریاست مسوولین وايي، په دغه ولایت کې یې د یو تاریخي اثر د قاچاق مخه نیولې ده.
د یاد ولایت د اطلاعاتو او کلتور مشر ذبیح الله امیري وايي، د هغه تاریخي اثر د قاچاق او پلور مخه یې نیولې، چې ۳۳۴ کاله لرغونوالی لري.
دی وايي، دغه اثر د ۹ متره په اوږدوالي، ۴۰ سانتي متره عرض او ۳۰۰ گرامه وزن په لرلو سره یو ځانگړی کاغذ دی، چې له سرو زرو او د لاجوردو اوبو څخه په گټه اخیستنې له ادم علیه السلام نه تر حضرت محمدﷺ پورې د پیغمبرانو شجره لیکل شوې ده.
د امیري په خبره، قاچاق کوونکو غوښتل دغه اثر د هغه له ساتونکي څخه په ۴ سوه زره امریکايي ډالرو وپیري او بهر یې قاچاق کړي.:«لومړني معلومات ښيي چې دغه اثر ۳۳۴ کاله پخوانی دی او د نورو څېړنو لپاره به متخصصینو ته ولېږل شي.»
نږدې هره اوونۍ د هېواد په بندرونو کې د تاریخي اثارو د قاچاق د مخنیوي خبرونه خپرېږي، خو دا چې دغه قاچاق څوک کوي او څوک پکې شریک دي په اړه هېڅ هم نه ویل کېږي.