د کور او ښار جوړولو وزارت وايي، چې د دوی د مشرتابه په لارښوونه او د دغه وزارت په هڅو د کندهار ښار د لومړۍ ناحیې اړوند د مخکېنۍ قول اردو په سیمه کې یو استوگنیز ښارگوټی جوړ او گټې اخیستنې ته وسپارل شول.
له یاد وزارت څخه په خپره شوې خبرپاڼه کې ویل شوي، یاد کوچنی استوگنیز ښارگوټی د دوی د مشرتابه په لارښوونه جوړ شو، چې د مدیریت، کنټرول او څارنې چارې یې په کندهار ولایت کې د کور او ښار جوړولو ریاست په غاړه وې.:«په زړې قول اردو کې جوړ دغه عصري استوگنیز ښارگوټي باندې شپږ سوه او لس زره (۶۱۰۰۰۰) ډالر لگښت راغلی، چې ډېزاین یې د کور او ښار جوړولو وزارت کړی او د پینځو میاشتو په موده کې جوړ شو.»
د خبرپاڼې له مخې، په دغه استوگنیز ښارگوټي کې هر کور، درې د او سېدو خونې، یو دهلېز، درې د حمام تشنابونه، یو پخلنځی او د احاطې دېوال لري او ټولې چارې یې باکیفیته او معیاري سرته رسېدلي دي.:«په یاد ښارگوټي کې هر کور په دوه سوه او دوه پنځوس (۲۵۲) متر مربع ځمکه کې جوړ او (۱۲۲۰۰) ډالر مصرف شوی.»
د معلوماتو له مخې؛ یاد کوچني استوگنیز ښارگوټي کې پنځوس (۵۰) بابه کورونه د یوه ښارگوټي په اډانه کې جوړ شوي، چې په ټوله کې ښارگوټی یوه د اوبو برمه، د اوبو ذخیره چې د پنځوس زره (۵۰۰۰۰) لیتره اوبو د ذخیره کولو وړتیا لري، د اوبو رسولو منظم سیستم او نورې اسانتیاوې برابرې شوي، چې شپږ اویا زره (۷۶۰۰۰) ډالره لگښت پرې راغلی دی.
د یاد وزارت د معلوماتو پر بنسټ، د ښاري پراختیا او هېوادوالو ته د ارزان بیه او معیاري سرپناه په برابرولو په پار یې هڅې پیل کړي دي، چې روان کال به یې عملي چارې لا گړندۍ شي.