د کابل امنیه قومندانۍ وايي، د یوولسمې حوزې پولیسو درې تنه د قتل په تور نیولي دي.
له کابل امنیه قومندانۍ څخه په خپره شوې خبرپاڼه کې ویل شوي، د نیول شوو اشخاصو له ډلې دوه تنو یې یو کال وړاندې یو نفر د یوولسمې حوزې په سیمه کې وژلی و او له هېواده بهر تښتېدلي وو، چې بېرته له راتگ سره د پولیسو له لوري ونیول شول.
د خبرپاڼې له مخې، دغه راز د نیول شوو اشخاصو له ډلې یو بل نفر چې څو ورځې وړاندې یې یو هېوادوال وژلی و، نیول شوی او د درې واړو مجرمینو دوسیې ترتیب او اړوندو ارگانونو ته به وسپارل شي.
د کابل امنیه قومندانۍ وايي، په کابل کې د رواني امنیت په موخه پولیس شپه او ورځ هڅه کوي، څو غله، قمار وهوونکي، وژونکي او نور مجرمین ونیسي او د قانون منگولو ته یې وسپاري.
که څه هم اوس د کابل امنیت د تېرو درېیو کلونو په پرتله ډېر ډاډمن شوی؛ خو لا هم وخت ناوخت ځینې جنايي پېښې کېږي، چې پولیس یې مجرمین پر وخت نیسي.