د المرصاد په نامه د یوې رسنۍ په حواله، افغان امنیتي ځواکونو د کابل ښار په پنځمه ناحیه کې د داعش ډلې یو مرکز کشف کړی.
د یادې رسنۍ د راپور پر بنسټ، افغان امنیتي ځواکونو د تېرې چهارشنبې په ورځ په پنځمه ناحیه کې د داعش ډلې پر یو مرکز عملیات کړي او د دې شبکې یو شمېر غړي یې نیولي دي.
که څه هم د نیول شوو داعشیانو کره شمېره نه ده ښودل شوې؛ خو له یاد مرکز څخه ګڼ شمېر وسلې، چاودېدونکي توکي او مهمات هم تر لاسه شوي.
د دې شبکې غړو غوښتل چې د محرم میاشتې په مراسمو باندې بریدونه وکړي، خو له یادو مراسمو وړاندې افغان امنیتي ځواکونه وتوانېدل چې دغه مرکز کشف او د کېدونکو بریدونو مخه ونیسي.
د دې مرکز مسوول افغان دی او په پاکستان کې داعش ته جذب شوی، په بلوچستان کې یې له یوې پاکستانۍ ښځې سره واده کړی او افغانستان ته د ترهګریزو بریدونو په موخه راستول شوی و.
د یادې سرچینې په خبره، په نیول شوو داعشیانو کې هغه کسان هم شامل دي، چې څو میاشتې وړاندې یې د کابل ښار په کوټه سنګي سیمه کې د اهل تشیع د یو سپرلۍ په موټر برید کړی و.
له نیول شوو داعشیانو داسې نوملړ هم تر لاسه شوی، چې غوښتل یې په پاکستان کې د ځینو مذهبي علماوو، مدرسو او حکومت مخالفو مطرح سیاستوالو باندې یې د بریدونو پلان درلود.
یادو کسانو د افغانستان سربېره په ځینو نورو هېوادونو کې هم ځینې خلک په نښه کول.