د ټرانسپورټ او هوايي چلند وزارت له لوري په خپره شوې خبرپاڼه کې راغلي چې: د رياست الوزرا اقتصادي مرستيال ملا عبدالغني برادر لخوا په کابل نړیوال هوايي ډګر کې د معیاري انتظارخونې د بنسټ ډبره کېښودل شوه.
خبر پاڼه زياتوي چې :د ریاستالوزراء اقتصادي مرستیال محترم ملا عبدالغني برادر اخوند نن د روان ۱۴۰۳ لمریز کال د اسد میاشتې په څلورمه نېټه په کابل نړیوال هوايي ډګر کې د معیاري انتظارخونې د بنسټ ډبره کېښوده.
په دغو مراسمو کې د ترانسپورټ او هوايي چلند سرپرست وزیر ملا حمیدالله اخوندزاده، د اقتصاد سرپرست وزیر قاري دین محمد حنیف، د خصوصي سکټور استازو او د کابل نړیوال هوايي ډګر مسوولینو هم حضور درلود.
په خبر پاڼه کې همدا رنګه راغلي چې: پر دغه انتظارخونه د خصوصي سکټور له لوري ۲۹۰ میلیونه افغانۍ پانګونه کېږي، چې په ۱۸ میاشتو کې به یې چارې بشپړې او ګټې اخیستنې ته وسپارل شي. دغه انتظارخونه د ۱۵۰ کسانو ظرفیت لري او د مسافرو لپاره ټولې اړینې اسانتیاوې په پام کې نیول شوې دي.
د یادونې وړ ده چې د ترانسپورټ او هوايي چلند وزارت په هېواد کې د معیاري ترانسپورټي خدمتونو د وړاندې کولو په موخه د روان ۱۴۰۳ لمریز کال په جریان کې د شاوخوا ۳.۷ میلیاردو افغانیو په ارزښت ۴۳ بنسټیزې پروژې په پلان کې لري، چې په پلي کېدو سره به یې د ترانسپورټ په برخه کې ډېرې اسانتیاوې رامنځته شي.