د هرې جګړې تر شاه ناټو او سي ايس ټي او سازمانونه دي.

د دوهمې نړيوالې جګړې وروسته چې په نړۍ کې کومه جګړه هم پېښه شوې/روانه ده، د هغې تر شا دوه پوځي سازمانونه ضرور وي چې ټوله نړۍ يې نا امنه کړې او دوی پرې خپلې بدمعاشۍ کوي؛ دغه پوځي سازمانونه چې د دوهمې نړيوالې جګړې وروسته د يو او بل په ضد جوړ شوي، د يو او بل په دښمنۍ کې يې همېش غريب هېوادونه او مسلمانان تر پښو لاندې کړي.

يوې خوا ته ناټو (NATO) ده چې څنګه يې زړه وغواړي همغسي وحشتونه د غرب په خوښه کوي؛ د نړۍ د امنيت په نامه يې ټوله نړۍ کې جګړه روانه کړې او همېش يې مظلومانو، مسلمانانو وينې تويولو ته کار ويلی.

د ډيموکراسۍ او د نړۍ د امنيت په نامه يې نږدې کلونو کې عراق، سوريه او افغانستان تباه کړ؛ اوس هم چې اوکراين کې کومه جګړه روانه ده هم د ناټو (NATO) او سي ايس ټي او (CSTO) تر منځ جګړه ده.

په فلسطين کې چې کومه جګړه روانه ده هم ناټو د اسرائيلو د صهيونيستي رژيم تر شاه ولاړه ده چې د فلسطينيانو قتل عام يې شروع کړی.

همدارنګه افريقايي هېوادونو کې پر مسلمانانو هم د ناټو په مرسته فرانسې قتل عام وکړ چې په لکونو انسانان، ماشومان، زنانه يې قتل عام کړل.

بل طرف سي ايس ټي اُو (CSTO) ده چې د ناټو او غربي هېوادونو مقابل جوړه او هر ځای کې يې کوښښ دا وي چې غريبو هېوادونو کې لومړی مشکلات ايجاد او بيا خپل حريف ته ضرر د سړې جګړې په مټ و رسوي.

ناټو NATO:(North Atlantic Treaty Organization)په ناټو پوځي سازمان کې دېرش هېوادونه د امريکا او اروپا شامل دي چې شعار يې خاص د روسيې پر ضد دی او د نړۍ د امنيت دعوه داران دي.

سي ايس ټي اُو CSTO:(Collective Security Treaty Organization)يو پوځي سازمان دی چې روسيه، تاجکستان، ارمنيا، بيلاروس، قزاقستان او قرغزستان پکې شامل دي خو کومک ورسره د چين، ايران او ځينو نورو غربي دښمنو هېوادونو هم شته.

دغه دوه پوځي سازمانونه دي چې نړۍ کې د هرې جګړې تر شا د دوی لاس وي او اوس هم همدوی نړۍ کې جګړې شروع کړي؛ خو دوی خپلو منځونو کې نه، بلکې په نورو هېوادونو کې د نورو ولسونو په قربانۍ سره سړه جګړه پر مخ وړي.

همدا اوس ناټو پاکستان کې د داعش روزل او بيا افغانستان کې پرې امنيت خرابولو اراده لري تر څو افغانستان بيا ځلي د جګړې په ډګر بدل او له افغانستان څخه ايران، چين، روسيې او منځنۍ آسیا هېوادونو کې پرې امنيت خراب کړي.

د شر او فساد ډلې روزنه هم فرانسه د همدې لپاره کوي تر څو دلته په افغانستان کې پرې امن خراب او بيا د دوی په ذريعه منځنۍ آسيا هېوادونو ته جګړه اوږده کړي.

دا چې بل طرف د شر او فساد ډلې سره تاجکستان، ايران او ځيني نورو هېوادونو کې ځيني جاسوسي کړۍ ولاړې وې خو کله چې هغوی پوه شول چې تر موږ خو د شر او فساد ډلې غرب ته وفادارې دي او له داعش سره يو شوي؛ ځکه هغوی لاس ترې واخيست.

همدا وجه وه چې تاجکستان يې دفتر ور بند کړ او د دوستم ځيني جنګي قوماندانان په ترکيه کې هم نيول شوي؛ يو مشهور قوماندان د جنبش ګوند په نامه د ګل محمد پهلوان يې له ترکيې و ايران ته ډيپورټ کړی.

دغه دوه طاقتونه (ناټو او سي ايس ټي اُو) اوس غواړي په منځنۍ آسيا کې بيا ځلي افغانستان د جګړې په ميدان بدل کړي چې دښمنۍ او بدمعاشي به دوی سرته سره رسوي خو وينه به د افغانانو تويېږي.

د طالبانو په راتګ سره نړيوالو جاسوسي ادارو ډيرې هڅې وکړې چې جګړه ونه درېږي خو بل طرف طالبانو په عمومي عفوه، د پرمختګ په کارونو، ټينګ امنيت او د ولس په متحد کولو سره تر ډېره توانېدلي چې د دغو سازمانونو او جاسوسي کړيو دسيسې شنډې کړي.

که افغانان هوسا ژوند غواړي نو بايد يو او بل و زغمي او مخکې تر دې چې د پرديو په تبليغاتو تيروځي بايد فکر وکړي، څوک څه وايي، هدف يې څه دی او تر ټولو بهتره خبره دا ده چې هره ډله يا سازمان چې ورته د امن د خرابولو وايي؛ يا هم د ملاتړ غوښتنه ترې کوي لومړی يې بايد کردار وګوري چې کردار کې دغه ډله څه کوي.

دا ځکه چې نن سبا د شر او فساد ډله هم د وطن دوستۍ نعرې وهي خو دا همغه لنډغر دي چې ستا افغانيت يې نه مانه او ترې منکر وو، اسلاميت يې نه مانه، پښتو يې نه منله او حتا د افغانستان له جغرافيې هم منکر وو؛ خو نن شعارونه د وطن دوستۍ زمزمه کوي ځکه بايد تاسو د دوی کردار ته فکر وکړئ و شعار ته نه!بل طرف افغانستان کې جګړه داعش غواړي کوم چې روزنه يې پاکستان کې کېږي خو له داسي نظام څخه چې د هلک و هلک او انجلۍ و انجلۍ واده ته يې قانوني جواز ورکړی او هيڅ اسلامي ارزښتونو ته درناوی نه لري دوی له هغه هېواد (پاکستان) څخه راځي دلته د اسلامي نظام مقابل جنګېده غواړي.

که د داعش له پيدايښت څخه تر ننه تاسو دوی مطالعه کړئ نو هر ځای به دوی د مسلمانانو مقابل جنګېږي؛ نارې يې د خلافت خو جګړې يې د مسلمانانو مقابل دي.

دا ځکه چې دوی اصل کې غربي پروژه ده او کردار يې د خوارجو دی، بلکې خوارج دي؛ بايد کردار ته يې توجه وسي نه شعار ته؛ په شعار سره يواځې غواړي د مسلمانانو ذهنونه مغشوش او خپل شوم اهدافو ته پرې ځان و رسوي.

افغان ولسه! راځئ چې نور په ګډه جګړې ته نه و وايو، راځئ چې ورور ته ورور و وايو، راځئ چې د وطن په آبادۍ کې لاسونه سره ورکړو، تر څو دومره توان او وس پيدا کړو چې بيا ځلي دغسي بدمعاشان راباندي بدمعاشي ونه کړي! او دا به هله امکان ولري چې ټول افغانان/ مسلمانان په يوه اتحاد شو او د دغسي جابرو سازمانونو له شر څخه ځانونه په امان کې کړو.

یادؤنه: په هندوکش‌غږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکش‌غږ توافق ورسره شرط نه دی.