د مخابراتو او معلوماتي ټکنالوژۍ وزارت یو ځل بیا له ټولو مخابراتي شبکو څخه غوښتي، چې سیمکارتونه باید ثبت او په دغه برخه کې گڼې اسانتیاوې برابرې کړي.
د یاد وزارت چارسمبالي وزیر نجیب الله حقاني د ایم.ټي.اېن مخابراتي شرکت له مشر هشام رمضان سره په لیدنه کې د مخابراتي ستونزو په حل او همدا راز د مخابراتي شرکت له لوري د سیمکارتونو د ثبت په بهیر خبرې کړې دي.
د مخابراتو وزیر ویلي، د مخابراتو او معلوماتي ټکنالوژۍ وزارت د کړنلارې له مخې د سیمکارتونو ثبتول د ټولو مخابراتي شبکو مکلفیت دی او مخابراتي شرکتونه باید په دې برخه کې اسانتیاوې ډېرې او دغه بهیر دې گړندی کړي.: «د سیمکارتونو له اړخه افغانانو ته ډېرې ستونزې پیدا شوې وې او ولس له ډېرو ستونزو سره مخ و او اوس دا زموږ مکلفیت دی چې دا ستونزې حل او ژر تر ژره افغانستان کې د سیمکارتونو د ثبت بهیر په بشپړ ډول قانوني کړو.»
د ایم.ټي.اېن مخابراتي شرکت مشر منلې، چې افغانستان کې د سیمکارتونو دوېش په برخه کې مخابراتي شرکتونو ناغېړي کړې او دوی اوس په دې هڅه کې دي چې د مخابراتو او معلوماتي ټکنالوژۍ وزارت او اترا ادارې د قوانینو په اساس خپل خدمات مخې ته یوسي تر څو وکولی شي د قانون په پلي کولو سره د مخابراتو او معلوماتي ټکنالوژۍ وزارت له لوري اسانتیاوې تر لاسه کړي.
تېره میاشت د مخابراتو او معلوماتي ټکنالوژۍ وزارت ویاند عنایت الله الکوزي ویلي، تر دې مهاله یې لس مېلیونه سیمکارتونه ثبت کړي او دغه لړۍ اوس هم روانه ده.
نوموړي ویلي وو، په افغانستان کې کابو ټول فعال سیمکارتونه ۲۳مېلیونو ته رسېدلي چې په دې شمېر د سیمکارتونو ثبت کېدل هم یوه موضوع ده او ثبت یې وخت غواړي.د امنیتي او مخابراتي برخې کارپوهان د مخابراتو وزارت له لوري د سیمکاتونو ثبتول غوره گام بولي.
دوی وايي، په هېواد کې د ټولو سیمکاتونو ثبتول کولی چې د جنايي پېښو په کمولو کې رغنده رول ولوبوي؛ ځکه په ثبت شوي سیمکارت څوک چاته گواښ نه شي کولی او نه څوک ازارولی شي.