د دې لیکنې په تېرو دوو برخو کې مو د قرآني آیتونو له مخې د بغاوت جبهې پر ماهیت بحث کړی، په دې برخه کې به د بغاوت جبهې موخې وڅېړو.
که څه هم په افغانستان کې نن سبا دا یاغي ډله په فزیکي توګه شتون نه لري، څو تنه یې د هندوکش د غره په لمنو کې وو چې د اسلامي امارت د امنیتي ځواکونو له خوا ونیول شول، ځینې یې د یخنۍ او له غره څخه د رالوېدو له امله مړه شول.
ځینې یې د خپلو غربي بادارانو غېږو ته ورغلل، له هېواد څخه د باندې د ځان په ګټه رسنیز تنور ګرموي، په تبلیغاتو، تورونو او توهینونو خپله باغي جبهه ژوندۍ ښیي.
دا باغي ډله تر اوسه د خپلو موخو د څرګندولو لپاره رسمي منشور او اساسي تګلاره نه لري، دا په خپله د دوی د کمزورۍ، بې وزلۍ او ګډوډۍ ښکارندويي کوي؛ دوی له دې پرته چې خپله ډوډۍ یې ورکه کړې، بله موخه نه لري او د خپلو پخوانیو غلو په لټه کې دي.
باغیان رسمي منشور نه لري، خو د مشرانو له ویناوو څخه یې دا شونې ده د هغو اهدافو په اړه چې شر او فساد ته د رسېدو لپاره یې د پردې په توګه ټاکلي دي؛ استناد وکړو.
د تابناک خبري اژانس د راپور له مخې، د یاغیانو د جبهې مشر احمد مسعود د فرانسې په ورځپاڼه “لارګل دوژو” کې لیکلي چې زموږ هدف د استبداد د بري مخنیوی او په افغانستان کې د معتدل اسلامي ولسواکی نظام رامنځته کول دي.
مسعود وايي چې موږ په افغانستان کې د ظلم مخه نیسو؛ ګرانو مسلمانانو! آیا د اسلامی نظام حاکمیت ظلم دی؟ اسلام خپل ټول وګړي د ږمنځې د شاخونو په څېر مساوي او فضیلت د تقوا پر بنسټ ګڼي؛ لکه څنګه چې الله سبحانه وتعالی د سورت الحجرات په ۱۳ آیت کې بیانوي.
دوی وايي چې زموږ موخه د منځلاري اسلامي، ولسي نظام رامنځته کول دي؛ آیا د اسلامي امارت نظام ولسي نه دی؟ آیا د حکومت دننه دیکتاتورانو، مفسدو او مخربو خلکو ته اجازه نه ورکول زیاتی او ولسواکي نه ده؟د افغانستان اسلامي امارت د امانت دارو او وړ خلکو په مټ حکومت چلوي، نه د هغو کسانو په څېر چې په جمهوري نظام کې یې د وړتیا لاپې وهلې، خو له ملت او هیواد سره یې خیانت وکړ.
اسلامي امارت د ایثار او قربانۍ په والو حکومت پرمخ وړي، نه به هغو کسانو چې د ولس په وینو یې ځانونه د ځمکې او شتو خاوندان کړي؛ ايا هغه څوک چې زياتې قربانۍ یې ورکړې، زیات مستحق نه دي؟
الله جل جلاله د سورة الانبیاء په ۹۴ آیت کې فرمایي: «فٙمَن یَعْمَلْ مِنَ الصَّالِحَاتِ وَ هُوَ مُؤْمِنٌ فَلَا کُفْرَانَ لِسَعْیِهِ وَ إِنَّا لَهُ کَاتِبُونَ»، ژباړه: هر هغه څوک چې نیک عمل وکړي او مؤمن وي، هڅه او کوښښ به یې پټ او بې شکریې پاتې نه شي، او بېشکه موږ به یې لیکونکي(امین) وو.
الله تعالی د سورت هود په ۱۱۵ آیت کې فرمایي: «وَاصْبِرْ فَإِنَّ اللَّهَ لَا يُضِيعُ أَجْرَ الْمُحْسِنِينَ»، ژباړه: صبر وکړئ، ځکه چې الله د نیکانو اجر نه ضایع کوي”.
هغه کسان چې نن په افغانستان کې په دولتي مقامونه کې دي، د قربانۍ او ایثار پر بنسټ ورته رسیدلي دي، نه د استبداد او دیکتاتورۍ له لارې.
اې د افغانستان درنو خلکو او ولسونو! که د باغیانو هدف اسلام وي، چې په معتدله بڼه حاکم شوی دی؛ ایا تاسو لمونځ، حجاب او د حدودو پلي کول نه وینئ؟ امنیت او سوکالي ورځ په ورځ ښه کېږي، دوی بیا هم ولې بغاوت کوي؟!
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.