لیکوال: انجینر کمال احمدزی
د شر او فساد ډله او ترڅنګ یې د تېر نظام پرسوده څهرې د امریکا ټاکنو ته په تمه دي؛ دوی هیله لري چې هلته به د ولسمشر په تغیر سره ټوله نړۍ کې تغیر راشي.
د امریکا په ټولو ایالتونو کې ټاکنې کېږي، مګر برخلیک یې یوازې د الیکټرال کالج په لاس کې دی؛ د کالج سیستم د امریکا CIA او FBI په لاس کې دی چې د امریکا د امنیت ټولې چارې د کانګرس امنیتي جرګه ګۍ مدیریت کوي.
د سنا مجلس امنیتي جرګه ګۍ کې هماغه د ویتنام د وخت زاړه سرتیري او قومندانان ناست دي چې په ټوله نړۍ کې د امریکا د مستقیمو او نیابتي جنګونو لپاره بوديجه تصویبوي.
امریکا د نړۍ د هېوادونو لپاره مشخصې پالیسیانې او تګلارې لري چې د سیاستوالو په بدلون د هغوی اهداف او موخي نه بدلېږي.
امریکا کې لویې کمپنۍ دي چې د امریکا ګټې په هر هېواد کې تشخیصوي د هغه لپاره ستراتیژي جوړوي، ګټې او زیانونه یې ګټګورۍ کوي او د یو پروپوزل په شکل یې په حکومت پلوري.
اوس د شر او فساد ډله په دې تمه ده چې هلته به د اشخاصو په تغیر د هغوی اهداف هم تغیر شي، دا ډول تمه کول په حقیقت کې د انسان په بې شعوري او سیاسي نابالغتوب دلالت کوي.
رښتیا خبره دا ده چې د شر او فساد ډله نه سیاست پېژني او نه شعور پېژني، ځکه چې د سیاست لپاره خاوره او هویت اساسي عناصر دي، خو دا خلک د افغان په نامه له شناخت څخه انکاري خلک دي؛ یو څوک چې وطني او ملتي هویت ونه لري په اوسنۍ نړۍ کې به سیاست چېرته وکړي؟
د سیاستونو نقشې خو د ځمکې لپاره ترسیمېږي او بیا په ځمکه کې تطبیق کېږي؛ انسانان خو خلايي او فضايي مخلوقات(ایلنیز) نه دي چې په خلا کې خپلې ستراتیژیانې تطبیق کړي.
بله مهمه خبره دا ده چې انسانان باید په بل د تکیې پر ځای په خپلو وړتیاو کار وکړي، په غربیانو اتکا کول یواځې یوه نتیجه لري چې دغسې به لکه یتیمان بې اسرې او بې نتیجې سړی پاتې شي؛ د غني غوندې به تښتي او د احمد مسعود غوندې به سیاسي دلال له سړي جوړېږي.
دا خلک زموږ د ننګونو د تاریخ په سپکاوي پسې راوتلي، خو دا یوه خبره جوته او ښکاره ده چې د دې وطن خلک په دې پوهېږي چې ددې وطن وارثان څوک دي او د دې وطن د عزت او عظمت ساتوونکي څوک دي؟
غربیان هم په دې پوهېدلي چې په افغانستان کې اغېز څوک لري او د افغان وطن اصلي وارثان او استازي څوک دي؟ نو ځکه مسعود او څو تنو ښځو سره د سیاست په تړاو څوک بحث نه کوي، د سیاست تړونونه د وطن اصلي زعیمانو سره کوي او د سوسیال یو څو پیسې لاشخورو ته ورکوي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.