د پرځېدلي جمهوریت څه باندې درې کاله کېږي چې افغانستان يې له مفکورې، نظريې، لنډغريزم او د قدرتونو له جزايرو خوندي شوی دی؛ شر خوښوونکي لارویان یې د افغانانو له لوري استفراق شول.
د شر او فساد ډلې ټپلې چې ایجاد کوونکي یې ځينې په واشنګټن، فاريس، دوشنبې، استانبول او د لندن په شمول په بېلابېلو ځايونو کې هستوګن دي او په هیواد کې د بدلون لپاره آنلاين يا هم د خواله رسنيو له لارې وخت نا وخت غونډې ترسره کوي.
په دې ډلو کې د مقاومت، ازادۍ او متحده تر نامه لاندې جبهې ځانونه د مطرح په حال کې ښیي؛ خو په تېرو دريو کلنو کې دې خیالي جبهاتو د خپلو مبارزو لپاره يوه کړنلاره او اساسي موخې هم واضحه نه کړې، چې د کومو موخو او د څه ډول افغانستان لپاره جګړه ترسره کوي؟
په دې ډلو ټپلو کې د شر او فساد يوه جبهه چې ځان ته د ملي مقاومت جبهې نوم ورکوي، خو په حقيقت کې جوړه له څو تنو پنجشېري ازمايل شويو سياسونو څخه ده؛ دا جبهه چې د کورنيو جګړو، کابل ټوټې کولو او د فاريس مستقیم ملاتړي احمد شاه مسعود د زوی احمد مسعود لخوا رهبري کېږي، په تېرو دريو کلنو کې په دې ونه توانېدله چې د شاوخوا لسو ترسره شويو مجازي ناستو کې يوه واحده اعلاميه د طالبانو په وړاندې ورکړي او يو ګډ واحد نظر رامنځته کړي.
همدا تېره مياشت د یادې جبهې د رهبرۍ شوری ناسته وه، چې ناسته د ټولنيزو رسنيو له لارې په ژوندۍ بڼه خپرېدله؛ په دې ناسته کې دوستم په خپلو ملګرو او د جبهې په دوه ګوني چلند نيوکې وکړې، نوموړي وويل:«مونږ ته دلته هيڅ څوک (چې د ده موخه ازبک او په ځانګړې توګه ترک تبار وو) د ارزښت په سترګه نه ګوري» هغه ډیرې سپینې او توندې خبرې وکړې، د ناستې فضا يې ګډوډه کړه، چې يادې خبرې وروسته د شړېدلې جبهې په لا انشعاب تمامې شوې، چې د يونس قانوني او دوستم ترمنځ يې ډېرو تا ويلو او ما ويلو ته لاره پرانيستله.
همدارنګه په وار وار د ویانا، دوشنبې او نورو حضوري ناستو کې د دوی ترمنځ حتی په يوې ګډې اعلاميې هم ګډ توافق تر دې دمه نه دی رامنځته شوی، چې دوی د کوم ډول مبارزې، سولې خبرو او راتلونکي لپاره مبارزه ترسره کوي.
ددې جبهاتو تازه اختلافات وخت ناوخت رابرسېره کېږي؛ تېر کال په لندن کې د يوې غونډې پر مهال احمد مسعود ته نږدې علي ميثم نظري (چې هغه مهال د احمد مسعود ډلې وياند وو) د لکونو ډالرو د غلا او اختلاس په قضیه کې د ځينو نورو لخوا له فزيکي برخورد سره مخامخ شو.
تازه په تازه د ازادۍ تر نامه لاندې د جبهې يو تن نصرت اقبال نومي کس د احمد مسعود اړوند له ځينو رازونو پرده پورته کړه، هغه په پخواني ټويټري او اوسني ایکس يو سپيس کې احمد مسعود یو فاحش ياد کړ او د خبرو په ترڅ کې يې زياته کړه، دا احمد مسعود چې ځان ډير عالي او پلان پلان بولي، د ده محترم په رهبري کې ښکنځل ماران ګمارل شوي دي، دا عالي جناب (احمد مسعود) غواړي پنجشيرۍ ټولنه له دې نور افغانستان څخه جدا کړي، ده کرار کرار همدا هڅه پيل کړې ده، اول غواړي پنجشیر د تاجکانو له لارې بيا بدخشان او هرات او همداسې دا نورې سيمې د هزاره او ازبک سره جدا کړي او له دې لارې دی د خپلو ښکنځل مارانو له لارې غواړي خپلې موخې تعقيب کړي».
له دې معلومېږي چې د شر او فساد د لارویانو ټولې ستونزې، اختلافات او د يو بل پښې وهل، په حقيقت کې د ځان مطرح والی، خپلو بادارانو ته نزدیکت او په خواله رسنيو د شتون او د قوت د څرګندتيا لپاره شپه او ورځ يو بل ته ښکنځل او د اختلافاتو راپورته کېدو اساسي عوامل دي.
دا خلک چې په لاس کې حتی تر خپل کنټرول لاندې يوه لوېشت د هيواد جغرافیه نه لري، په انلاين ډول يو بل ته لاس په ماشه او په ځمکو وهلو لپاره شپه او ورځ کار کوي.
د شخصي او بادارانو لپاره د مبارزې ترسره کوونکو شریرو لارويانو دا را برسيره کېدونکي اختلافات نه هم اولي او نه هم وروستني دي، بلکې د شخصي ګټو لپاره به یې نورې ډیرې ناويلې له وخت سره را برسېره شي، چې له لارې به یې افغان ولس درک کړي چې دوی په حقيقت کې څوک، د کومې موخې لپاره او ولې په داسې اختلافاتو او دروني ستونزو اخته دي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.