د صنعت او سوداګرۍ وزارت په يوه خبر پاڼه کې ویلي، چې کابل کې د ترکیې سفیر جنک اونال د دغه وزارت له وزیر نورالدین عزیزی سره په کتنه کې هغه ته د اقتصادي همکاریو سازمان د وزیرانو پنځمه غونډه کې د ګډون بلنه ورکړې ده.
په خبر پاڼه کې راغلي، چې دغه ناسته به د ترکیې په کوربتوب د روان کال د نومبر له ۲۴مې تر ۲۶مې نېټې پورې ترسره شي.
د ترکیې سفیر همدا راز ښاغلي عزيزي ته د ترکیې د سږ کال په «حلال» نندارتون کې هم د ګډون بلنه ورکړې ده.
ناسته کې د دوه اړخيزه سوداګرۍ پر پراختيا، د ټرانزيټ برخه کې په اسانتياوو رامنځته کولو او افغانستان ته د بهرنۍ پانګونې پر جذب هم خبرې شوې دي.