د افغان حکومت وياند مولوي ذبيح الله مجاهد د استانبول د وروستیو مذاکراتو په اړه په خبري کنفرانس کې ويلي، چې د پاکستاني طالبانو فعاليت د افغانستان په اوسني حکومت پورې کومه اړه نه لري او له ډېر پخوا یې خپل فعاليت پيل کړی دی.
ښاغلي مجاهد ويلي، پاکستاني طالبانو خپل فعاليت له ۲۰۰۱ کال څخه پيل کړی او لامل یې هم د پاکستان د پوځي رژيم ناسم سياست او په پاکستاني ولس ظلمونه وه.
نوموړی وايي، پاکستاني طالبان د پاکستان د پوځي رژيم د بمباريو او ظلمونو په وړاندي را ولاړ شوی تحريک دی او د پاکستان پوځ د افغان حکومت له راتګ مخکې په قبايلي سيمو کې له ولس سره په جګړه و.
د مجاهد په خبره په پاکستان کې نا امني پخوانۍ ستونزه ده، چې بايد دوی يې خپله په خپل کور کې حل کړي.