د پښتون ژغورنې غورځنګ مشر منظور پښتين خوست، پکتيکا او کونړ ولايتونو کې د پاکستان پوځي رژيم له لوري د بېګناه ماشومانو او ښځو شهيدانول یو غیر انساني، غیر اسلامي او د نړیوالو قوانینو خلاف عمل بللی دی.
هغه ويلي، ماشومان او ښځې وژل، بېګناه میشت کډوال وهل او ژړول د ترهګرۍ ضد کړنې نه دي؛ بلکې په خپله ترهګري ده.
پښتين ويلي، پاکستان په افغانانو ظلم کوي، او بیا هیله لري چې په بدل کې دې افغانان د دوی سره مینه وکړي، چې په انساني فطرت کې داسې څه ممکن نه دي.
د نوموړي په خبره پاکستان اوس د کوزې پښتونخوا د بېګناه پښتنو ماشومانو او ښځو د وژنو تر څنګ، په بر وطن کې هم د پښتنو ماشومانو او ښځو د وژلو لړۍ پیل کړې ده.
ښاغلي پښتين همدا راز ويلي، چې پاکستان پوځي رژيم دا هر څه د غربي پروژو په مټ ترسره کوي او په وينا یې د خپلو ګټو لپاره له هر څه تېرېدونکی دی.
هغه ويلي، چې د پښتنو د وېشلو او خپل ظلم د روان ساتلو لپاره پاکستان پوځي رژيم یو شمېر پښتانه سیاستمداران، سیمهیز مشران او خبريالان په بیه اخیستي دي، څو د پښتنو ترمنځ دښمنۍ ته کار وکړي.
د منظور پښتين په خبره پنجابي جنرالان فکر کوي، چې د لوبې په پای کې به دوی د ډالرو او نړیوالو تجارتونو څښتنان شي، لاهور، اسلام اباد او فیصلاباد به د مستیو، رڼاګانو او خندا مرکزونه وي، او پښتون ته به اوښکې، وینې، د ښځو او ماشومانو لویې لویې هدیرې، لادرکه ځوانان، سپینږیري، او له کوېټه تر پېښوره او له وزیرستانه تر سوات پورې ویجاړ بازارونه پاتې شي. کابل، کندهار، خوست او ننګرهار به د جنګونو خاشاک جوړ شي.
خو پښتون خبرداری ورکړی، چې پاکستان پوځي رژيم دې په ياد ولري، چې دا ځل به لوبه داسې پای و نه مومي لکه څنګه چې دوی فکر کړی دی.
پښتين زياتوي، چې دا د لوبې پیل دی او د تاریخ په اوږدو کې زموږ ملت اکثر د لوبې په پیل کې تاواني ښکاري، خو انجام به یې بیا نړۍ په یاد ولري.