حزب الله ډلې ویلي، په تېرو ۲۴ ساعتونو کې یې پر اسرائيل ۷۵ بریدونه کړي، چې پکې سرحدي پوستې، پوځي اډې، د قومندې مرکزونه او نور نظامي وسایط په نښه شوي دي.
ورته مهال، د دغې ډلې سیاسي شورا مرستیال محمود قماطي په خپلو تازه څرګندونو کې د ایران او مقاومت ځواکونو پر وړاندې له اسرائيل سره د اوکراین مرستې چمتووالی عبث بللی او ویلي یې دي چې اوکراین په سیمه کې د مداخلې توان نه لري.
نوموړي زیاته کړې، چې لویدیځ له اوکراین څخه د روسیې پرمختګ مخنیوي لپاره د یوې وسیلې په توګه کار اخلي او د همدې امله حزب الله په روانه جګړه کې د روسیې ملاتړ کوي.