ارګ په يوه خبرپاڼه کې وايي، چې د افغان حکومت رئیس الوزرا ملا محمد حسن اخوند د قزاقستان د لومړي وزير مرستيال او د اقتصاد وزیر سیریک ژومان ګارین سره کتلي.
د دې لیدنې پر مهال رئیس الوزرا افغانستان او قزاقستان دوه مسلمان هېوادونه بللي چې په سیاسي، اقتصادي، دیني او فرهنګي برخو کې ګڼ مشترکات لري.
د قزاقستان د لومړي وزیر مرستیال او د اقتصاد وزیر ویلي، دوی غواړي له افغانستان څخه قزاقستان ته د صادراتو کچه لوړه کړي، په همدې موخه يې نن په کابل کې افغان – قزاق ګډه سوداګریزه خونه پرانیستله.
دغه راز نوموړي رئیس الوزراء ملا محمد حسن اخوند ته د دغه هېواد د ولسمشر له لوري د سفر رسمي بلنه هم ورکړه.
رئیس الوزراء د دواړو هیوادونو اړیکي مهمې بللي او ویلي یې دي، چې دا مهال افغانستان په بېلابېلو برخو کې ښه پرمختګونه کړي، چې دا ټول د دوستو هېوادونو د همکاریو پایله ده.
ملا محمد حسن اخوند دغو ښو اړیکو ته په اشارې وویل، ټولو اړوند ادارو ته لارښوونه کېږي چې په بېلابېلو برخو کې د قزاقستان او افغانستان ترمنځ د همکاریو د پراختیا او د اړیکو پیاوړتیا لپاره عملي ګامونه واخلي.
ملا محمد حسن اخوند د قزاقستان ولسمشر ته هم افغانستان ته د سفر بلنه ورکړه.