د تخنیکي او مسلکي زده کړو ادارې ویلي، چې د یادې ادارې رئیس مولوي غلام حیدر شهامت د یوه پلاوي په مشرۍ د علمي، تخنیکي او ښوونیزو همکاریو د پراختیا او د مسلکي زده کړو په برخه کې د تجربو د تبادلې په موخه مالیزیا او اندونیزیا ته په رسمي سفر ولاړ.
د معلوماتو له مخې، یاد پلاوي ته د یوه نړیوال بنسټ له لوري بلنه ورکړل شوې، چې د نړۍ په څه باندې ۷۰ هېوادونو کې د تخنیکي او مسلکي زده کړو مرکزونو لپاره د ښوونیزو تجهیزاتو او عملي زده کړو سیسټمونو د طرحې او تولید په برخه کې فعالیت کوي.
د یاد سفر په ترڅ کې به له تخصصي او ښوونیزو بنسټونو سره د همکاریو پر پراختیا، د استادانو د علمي او مسلکي ظرفیتونو پر لوړولو، د ښوونیزو سرچینو ډیجیټلي کولو، د تدریس له معاصرو لارو چارو سره پر بلدتیا او د کوربه هېوادونو له علمي او تخنیکي تجربو څخه پر ګټې اخیستنې خبرې وشي.