د ریاستالوزراء اقتصادي معاونیت ویلي، چې د ریاست الوزراء اقتصادي د مرستیال ملا عبدالغني برادر په مشرۍ اقتصادي کمېسیون پرېکړه کړې، چې په هېواد کې د توکو د نرخونو او کیفیت د کنټرول لپاره دې اړوندې کمېټې خپل فعالیتونه جدي او منظم کړي او سرغړوونکو سره دې د نافذه قوانینو له مخې چلند وشي.
د اقتصادي کمېسیون د معلوماتو له مخې، دا پرېکړه نن سېشنبه په مرمرینه ماڼۍ کې د کمېسیون په ځانګړې غونډه کې شوې ده.
د پرېکړې له مخې، په ولایتونو او ولسوالیو کې به د صنعت او سوداګرۍ وزارت تر مشرۍ لاندې د مستهلکینو کمېټې، د دغه وزارت د لارښود له مخې، د توکو د نرخونو کنټرول په برخه کې خپل مسوولیتونه په جدي ډول ترسره کوي. په کابل ښار کې به هم د کابل ښاروالۍ تر مشرۍ لاندې اړونده کمېټه خپل فعالیتونه پیاوړي کوي او راپورونه به یې وخت پر وخت د تعرفې کمېټې ته وړاندې کېږي.
همدارنګه، د هېواد په سوداګریزو بندرونو کې د خوړو او درملو معینیت او د وارداتي توکو د کیفیت د کنټرول په برخه کې د معیار او کیفیت اداره مکلفه شوې، چې خپل فعالیتونه لا پیاوړي کړي.
د اقتصادي کمېسیون د پرېکړې له مخې، د تعرفې کمېټه یوازې هغه مهال پر وارداتي توکو تعرفې زیاتولی شي، چې په هېواد کې د ورته تولیداتو د کافي کمیت ترڅنګ د هغو کیفیت هم له منل شویو معیارونو سره برابر وي.
اقتصادي کمېسیون د تعرفې کمېټې ته سپارښتنه کړې، چې د بازارونو د نرخونو او کیفیت د کنټرول په اړه د اړوندو کمېټو او خپلو فعالیتونو راپورونه په منظم ډول وړاندې کړي.