د معیار او کیفیت ادارې په یوه خبرپاڼه کې ویلي، چې د اقتصادي کمېسیون تر تایید او د تخنیکي پړاوونو تر بشپړېدو وروسته، د افغان حکومت د مشرتابه له لوري ۴۹ کورني معیارونه منظور شوي دي.
دغه معیارونه د ودانیزو توکو، مخابراتو، خوراکي او کرنیزو محصولاتو، درملو، سینګار توکو، نساجۍ، څرمن، کاغذ، چاپېریال ساتنې، کیمیاوي موادو، پلاستیک، طبي تجهیزاتو او کانونو برخې رانغاړي.
د معیار او کیفیت ادارې په وینا، د دغو معیارونو تصویب به د محصولاتو او خدماتو د کیفیت لوړولو، د بازارونو معیاري کولو، د خوندیتوب او روغتیا ساتنې او د معیارونو پر تطبیق د څارنې په پیاوړتیا کې مرسته وکړي.