د کورنیو چارو وزارت وايي، د دې وزارت وزیر خلیفه سراجالدین حقاني غزني، پکتیکا، پکتیا او میدان وردګ ولایتونو ته د سفر پر مهال له سیمهییزو مسؤلینو، مجاهدینو، علماوو، قومي مخورو او ولسي خلکو سره لیدلي او د هغوی ستونزې او غوښتنې یې اورېدلې دي.
د معلوماتو له مخې، نوموړي د غزني په شلګر ولسوالۍ کې د نورالمدارس مدرسې د څه باندې ۴۰۰ فارغینو په مراسمو کې ګډون کړی او په نورو ولسوالیو کې یې له قومي مخورو، ښوونیزو او روزنیزو مرکزونو لیدنه کړې ده.
سرچینه زیاتوي، چې ښاغلي حقاني په پکتیکا کې له ملکي او نظامي مسؤلینو او معلولینو سره هم لیدلي او د هېواد د ابادۍ، پرمختګ، امنیت، اداري چارو او د نظام د پیاوړتیا په اړه یې خبرې کړې دي.
نوموړي همداراز په پکتیا او میدان وردګ ولایتونو کې له سیمهییزو خلکو سره لیدلي او د وفات شویو کسانو د کورنیو د غړو په فاتحه کې یې ګډون کړی دی.