انادولو خبري اژانس راپور ورکړی، چې د اوکراین ولسمشر ولادیمیر زېلېنسکي ویلي، روسیې او اوکراین د جګړې د بندیانو پر داسې تبادلې هوکړه کړې، چې د دواړو هېوادونو ترمنځ به تر اوسه تر ټولو لویه تبادله وي.
زېلېنسکي د امریکا د ولسمشر ډونالډ ټرمپ له ځانګړو استازو سټیو وېټکاف او جېرډ کوشنر سره تر لیدنې وروسته خبریالانو ته ویلي، چې د روسیې لوري د بندیانو له تبادلې سره موافقه کړې او دا د روانو خبرو اترو یوه مهمه او عملي لاسته راوړنه ده.
نوموړي د متحده عربي اماراتو په پلازمېنه ابوظبۍ کې وروستیو مذاکراتو ته په اشارې ویلي، چې دغو خبرو د جګړې د پای ته رسېدو په اړه هیلې پیدا کړې دي او تمه ده چې په راتلونکو پړاوونو کې هم خبرې دوام ومومي.
زېلېنسکي زیاته کړې، چې د راتلونکو مذاکراتو په پړاو کې به اروپایي استازي هم د مذاکراتي پلاوي د غړو په توګه ګډون وکړي او په خبرو کې به خپل نظرونه وړاندې کړي.