د سرحدونو، قومونو او قبایلو چارو وزارت ویلي، چې د یاد وزارت د سرحدي پلټنو معین مولوي عنایتالله شجاع په مشرۍ په غزني ولایت کې د دیني عالمانو، قومي مشرانو او عامو خلکو په ګډون لویه ولسي غونډه جوړه شوې ده.
د معلوماتو له مخې، په دې غونډه کې د اسلامي نظام تر چتر لاندې د شریعت د نفاذ، ولسي همغږۍ، د نظام د ملاتړ او د هېواد د ابادۍ پر موضوعاتو خبرې شوي. د غونډې ویناوالو له خلکو غوښتي، چې د هېواد د خپلواکۍ، نظام ساتنې او پرمختګ لپاره ګډې هڅې وکړي.
سرچینه زیاتوي، چې دیني عالمانو او قومي مشرانو د افغان حکومت د کړنو او خدمتونو ستاینه کړې او په ورته مهال یې د خپلو سیمهییزو ستونزو د حل غوښتنه هم کړې ده.