مالیې وزارت ویلي، چې د یاد وزارت وزیر ملا محمد ناصر اخوند ایران ته د خپل رسمي سفر په ترڅ کې د دغه هېواد د بهرنیو چارو له وزیر سید عباس عراقچي سره لیدلي دي.
د معلوماتو له مخې، په دې لیدنه کې د دوهاړخیز اقتصادي کمېسیون د راتلونکې غونډې پر جوړېدو، د ابونصر فراهي ګمرک د سرحدي زېربناوو پر پراختیا، د ګمرکونو پر ۲۴ ساعته فعالیت او د دوغارون، ماهیرود او میلک بندرونو د ظرفیت لوړولو په اړه خبرې او هوکړې شوې دي.
سرچینه زیاتوي، چې د ایران د بهرنیو چارو وزیر په افغانستان کې د مخدره توکو پر وړاندې د مبارزې او اقتصادي ثبات په برخه کې د افغان حکومت د رول ستاینه کړې او په اقتصادي او سیاسي برخو کې یې د همکاریو ډاډ ورکړی دی.