د صنعت او سوداګرۍ وزارت په یوه خبرپاڼه کې ویلي، چې د دغه وزارت د معین مولوي احمدالله زاهد په مشرۍ افغان پلاوي او په هند کې د افغانستان سفیر مفتي نور احمد نور د هند د ۴۵م نړیوال نندارتون (ITPO) د پرانیستې په مراسمو کې ګډون کړی دی.
د معلوماتو له مخې، مولوي احمدالله زاهد د نندارتون په څنډه کې د هند د سوداګرۍ له وزیر پیوش ګویال سره لیدلي او د دواړو هېوادونو ترمنځ د سوداګریزو اړیکو پر پیاوړتیا او د افغانستان د تولیداتو پر معرفي کولو یې خبرې کړې دي.
سرچینه زیاتوي، چې په دغه نندارتون کې د افغان سوداګرو ۶۸ غرفې جوړې شوې وې، چې وچې مېوې، افغاني غالۍ او بانکي خدمتونه پکې نندارې ته وړاندې شوي وو.