د مالیې وزارت خبر ورکړی، چې د دې وزارت وزير، ملا محمد ناصر اخوند په مشرۍ پلاوي ایران ته د خپل رسمي سفر په ترڅ کې د دغه هېواد د اقتصاد او مالیې له وزیر ډاکټر مدنيزاده سره لیدلي او د دواړو هېوادونو ترمنځ یې د اقتصادي او سوداګریزو اړیکو پر پراختیا خبرې کړې دي.
د مالیې وزارت د معلوماتو له مخې، په دې لیدنه کې د پانګونې، سرحدي او ګمرکي مسایلو، سوداګرۍ، ټرانزیټ او د دواړو هېوادونو ترمنځ د اقتصادي همکاریو د ګډ کمېسیون پر فعالیتونو بحث شوی دی.
سرچینه زیاتوي، چې دواړو لورو د افغانستان او ایران د ګمرکي سیسټمونو پر نښلولو، د ګمرکي فعالیتونو پر ۲۴ ساعته کولو او په بندرونو کې د موټرو د تګ راتګ پر زیاتولو هوکړه کړې ده.
د هوکړې له مخې، ټاکل شوې د اسلامکلا بندر ګمرکي فعالیتونه د راتلونکې شنبې له ورځې ۲۴ ساعته شي.
همداراز دواړو لورو په بندرونو کې د خاکپولۍ د له منځه وړلو، د موټرو د ځنډېدو مخنیوي، د قاچاقي توکو د مخنیوي او ایران ته د افغان صادراتو لپاره د اسانتیاوو پر برابرولو هم هوکړه کړې ده.


