د ننګرهار د تورخم ګمرک مسوولین وايي، د کډوالو د کډې بار یوه لسټایره لارۍ د پلټنې پر مهال یې یو شمېر وسلې، مرمۍ او نشهيي توکي کشف او ضبط کړي دي.
د معلوماتو له مخې، په دې لارۍ کې ۱۷ میله توفنګچې، ۴۳ شاجورونه، ۱۶۷ د توفنګچو مرمۍ او پنځه کیلو او ۲۵۰ ګرامه تابلیتکا ګولۍ موندل شوې دي.
د چارواکو په وینا، د دغو توکو د لېږد په تور د موټر چلوونکی نیول شوی او د نورو څېړنو لپاره به عدلي او قضايي ارګانونو ته وسپارل شي.