د تسنیم خبري اژانس د راپور له مخې، د ازبکستان د اوبيزو سرچینو وزیر «شوکت خمرایف» په یوه مطبوعاتي کنفرانس کې د ځینو رسنیو هغه ادعاوې رد کړي چې ګواکې د سرپرست حکومت لخوا د قوشتیپې کانال جوړول یو دښمنانه عمل دی.
نوموړي له سرپرست حکومت سره د ډیپلوماسۍ او همکارۍ پر اهمیت ټینګار کړی او زياته کړې یې ده چې، افغانستان د آمو سیند له اوبو څخه د ګټې اخیستنې مشروع حق لري.
د ازبکستان د اوبيزو سرچینو وزیر ويلي «افغانان زموږ خپلوان دي، دوی د آمو سیند څخه د ګټې اخيستنې مشروع حق لري، ایا موږ باید وسله پورته کړو او له دوی سره جګړه وکړو؟ نه هېڅکله نه، موږ له دوی سره ښې اړیکې جوړوو».
شوکت خمرايف همدا راز د خپل هېواد له خلکو څخه هم غوښتي چې، د اوازو او غلطو معلوماتو تر اغېز لاندې رانه شي او افغانستان ته د خپل دوست هېواد په توګه وګوري.
د ازبکستان وزیر زیاته کړې چې، په دې وروستیو کې یې څلور ځله افغانستان ته سفر کړی او په هرځل سفر کې یې د سرپرست حکومت له خوا تود هرکلی شوی دی.
ياده دې وي چې، تر دې وړاندې داسې راپورونه خپاره شوي و، چې ګواکې ازبکستان د قوشتېپې کانال د جوړوېدو مخالفت کوي او له آمو سيند څخه ګټه اخيستنه د افغانستان حق نه ګڼي.