کابل کې د ایران سفیر، علي رضا بېکدلي او د افغانستان د سرحدونو، قومونو او قبایلو چارو وزیر، ملا نور الله نوري د ګډ سرحد پر تثبیت او د سرحدي نښو نښانو پر نوي کولو خبرې کړي.
د سرحدونو، قومونو او قبایلو چارو وزارت د خبرپاڼې له مخې بېکدلي ویلي ایران هڅه کوي چې له افغانستان سره سیاسي، او سوداګریزې اړیکې نورې هم پراخې او پیاوړې کړي.
نوموړي ویلي چې هېواد یې چمتو دی چې له افغانستان سره د ګډ سرحد د تثبیت په برخه کې کار ته دوام ورکړي.
ورته مهال د سرحدونو، قومونو او قبایلو چارو وزیر ملا نورالله نوري، د سرحد د تثبیت او سرحدي نښو د نوي کولو پروسه کې د کارونو د چټکیا، د ستونزو په له منځه وړلو او نورو برخو کې د بشپړې همکارۍ ډاډ ورکړی دی.
ښاغلي نوري ویلي، چې په نږدې راتلونکي کې به د افغانستان او ایران ترمنځ د سرحد د تثبیت او سرحدي نښو د نوي کولو پروسه په رسمي ډول پیل شي.