د روسیې د بهرنیو استخباراتو ادارې په یوه اعلامیه کې ویلي چې سرګي ناریشکېن د پنجشنبې او جمعې په ورځو (اپرېل ۱۷مه او ۱۸مه) باکو ته د «افغانستان، سیمهییز اتصال، امنیت او پراختیا» په کنفرانس کې د ګډون لپاره سفر کړی دی.
ناریشکېن په دغه غونډه کې څرګنده کړې چې لوېدیځو هېوادونو د افغانستان شتمنۍ کنګل کړي او د «طالبانو» (اسلامي امارت) پر وړاندې یې بندیزونه لګولي دي. یاد روسي چارواکي همداراز ټینګار کړی چې دغه هېوادونه د طالبانو د مخالفانو د ملاتړ لپاره لارې چارې لټوي.
نوموړي دغه راز ویلي چې، لوېدیځې استخباراتي ادارې هڅه کوي چې د طالبانو له مخالفینو سره مرسته وکړي او افغانستان بېثباته وساتي. نوموړي زیاته کړې چې لوېدیځ دا چلند د خپلو جیوپولیټیکي ګټو د پرمختګ لپاره کوي.
د روسیې د بهرنیو استخباراتو مشر د دې سفر په بهیر کې د اذربایجان د استخباراتو له یو شمېر چارواکو سره هم لیدلي او خبرې یې کړې دي.
سرګي ناریشکېن دغه راز ویلې چې: «افغانستان یو مهم جیوپولیټیک موقعیت لري او زموږ د هېوادونو ګډې ګټې دا غواړي څو په دغه هېواد کې بیارغونه او سوکالي ډېره شي.»