د رويټرز خبري اژانس د راپور له مخې، د امریکا په کانګرس کې د ایران د جګړې او پنټاګون ته د ۳۵۰ میلیارده ډالرو اضافي بودجې د ځانګړي کولو په اړه د ډونالډ ټرمپ غوښتنې پر سر اختلافونو د کرېسمس تر رارسېدو مخکې د امریکا د فدرالي حکومت د احتمالي تړل کېدو اندېښنې زیاتې کړې دي.
د راپور له مخې، د دواړو ګوندونو قانونجوړوونکو خبرداری ورکړی چې دغه اختلافونه ښايي د حکومت د بودجې پر سر د هوکړې مخه ونیسي.
د امریکا د حکومت اوسنۍ بودجه د ډسمبر تر ۱۱مې اعتبار لري او کانګرس یوازې شاوخوا درې اونۍ وخت لري، څو د فدرالي ادارو د فعالیتونو د دوام لپاره پر نوې بودجې هوکړه وکړي.
د راپور له مخې، په سنا جرګه کې اختلافونه تر ټولو جدي دي؛ ځکه د بودجې د ګډې طرحې تصویب د ۱۰۰ غړو له ډلې لږ تر لږه ۶۰ مثبتو رایو ته اړتیا لري.


