د مقاومت په نوم یوې ناکامې جبهې د تېرو انلاین ناکامو غونډو په دوام بیا انلاین غونډه کړې او په کې یې د دوی په خبره د وسله وال مقاومت او یو تبعید شوي حکومت د جوړېدو خبره کړې ده.
۲۳ کاله وړاندې همدغه د شر او فساد لارویانو د بهرنیو په ملاتړ واک ته ورسېدل؛ هر ډول امکانات یې په واک کې وو، نظامي او بهرنی سیاسي ملاتړ یې درلود، خو د طالبانو له اوږد او تاریخي مقاومت وروسته یې له افغانستانه پښې سپکې کړې.
دوی له طالبانو سره شل کلنه جګړه کې د ټولو امکاناتو لرلو سربېره سخت پاتې راغلل؛ په داسې حال کې چې دوی اوس په افغانستان کې هیڅ فزیکي حضور نه لري او نه هم په داخل او نه بهر کې د چا ملاتړ لري، خو بیا هم د جګړې فکر لري او په دې غلط فهمۍ او خوش باورۍ کې دي چې ګنې دوی به په انلاین ډول وکولی شي د طالبانو پر ضد متحد، جګړه به پیل او طالبان به مات کړي.
تېره شپه د عبدالرشید دوستم خبرو وښوده چې د دوی تر منځ سخت او شدید اختلافات موجود دي او د دوی تر منځ د قومي لیدلوري، قومي ګټو، او قومي وېش موجودیت هغه څه دي چې ثابتوي چې دوی به هیڅکله د طالبانو پر ضد متحد نه شي.
په تېر کې د دوی تر منځ تربګنیو، د کابل جګړو، د یو بل وژلو او تر منځ یې بې باوریو ته په کتلو داسې نه ښکاري چې دوی به د طالبانو پر ضد یوه متحده جبهه جوړه کړي او یوه خوله به شي.
د مقاومتیانو تر منځ د ګټو ټکر هغه څه دي چې دوی یې لرې ساتلي او امکان نه لري چې په یوه دسترخوان به راټول شي.دوی هسې خپله انرژي مصرفوي او لکه د امارت تېري واکمنۍ کې یې چې هڅو کومه فایده نه وه کړې، دا ځل به یې هم راټولېدنې او خبرې هیڅ ګټه و نه کړي او لکه د تېر ځل به دا ځلې هم ناهیلي او ناکام شي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.