د پاکستان د بشري حقونو کمېسیون وايي، د بنو په پروني لاریون کوونکو د ډزو له امله ۵تنه وژل شوي او تر ۲۰ ډېر ټپیان شوي دي.
یاد کمېسیون پر سولهییز لاریون کوونکو د برید غندنه کړې او غوښتنه یې کړې چې د برید عاملین دې د عدالت منگولو ته وسپارل شي.
پرون د خیبر پښتونخوا په بنو کې زرگونه راټول شوي وو او په خپله سیمه کې یې د امن غوښتنه کوله؛ خو د پاکستان د پوځ له لوري پر لاریون کوونکو ډزې وشوې او لاریون کوونکي هم تیت او پرک شول.
په ټولنیزو رسنیو کې په خپرو شوو ویډیوگانو کې ښکاري چې د عامو خلکو سربېره پولیس هم منډې وهي او ځانونه خوندي ځایونو ته رسوي.په بنو کې له تېرو څو ورځو راهیسې کاربارونه تړل شوي دي.
پر لاریون کوونکو د ډزو له امله په بنو کې اعلانونه شوي او د بنو سربېره له لکي مروت، کرک او شمالي وزیرستان له خلکو هم غوښتل شوي، چې له سپینو بیرغونو سره راووځي او په ننني احتجاج کې برخه واخلي.
ځايي خلک د پاکستان له پوځ غواړي چې د بنو شاوخوا سیمو څخه ووځي؛ ځکه د دوی له امله یې سیمه ناامنه شوې ده.
په بنو کې د پروني لاریون وروسته د پښتنو ملتپاله گوندونو هم د سیمې له خلکو غوښتي، چې ولسي پاڅون وکړي او د بنو پولیس لاین مخکې دې پرلت ووهي.
په پاکستان کې د پاکستاني طالبانو او بلوڅ ملتپاله وسلهوالو بریدونو زور اخیستی، چې له امله ځايي خلکو هم د پاکستان حکومت د تگلارو پر ضد لاریونونه کوي.
پاکستان تېره میاشت اعلان کړی و، چې په قبایلي سیمو کې د عزم استحکام په نامه عملیات کوي، چې د دغه اعلان وروسته سولهییز لاریونونه هم پیل شوي او د دغه عملیاتو د نه کېدو غوښتنه کوي.
