پوره ۲۱ کاله وړاندې د پاکستان کراچۍ کې ډاکټره عافیه صدیقي د پاکستان د پخواني دیکتاتور جنرال پرویز مشرف د حکومت له لوري ونیول شوه او په امریکا یې وپلورله.
پاکستانی سناتور مشتاق احمد خان وایي چې صدیقي جنرال مشرف په پینځه زره ډالرو پلورلې وه.
صدیقي څه موده د کابل بګرام زندان کې بندي وه، خو وروسته امریکا ته ولیږدول شوه.
په ۲۰۱۰ کال کې د نیو یارک یوې محکمې صدیقي ته د ۸۶ کلن بند سزا واورله.
صدیقي ته په غزني کې په امریکایانو د ډزو کولو په تور د بند سزا اورول شوې.
په صدیقي تور دی چې له القاعدې سره یې اړیکې درلودې.
هغه تور چې د صدیقي خور فوزیه صدیقې رد کړی دی.صدیقي اوس ۵۲ کلنه ده چې د بند مودې پوره کیدو پر مهال به یې عمر ۱۱۰ کاله وي.
نوموړې اوس د امریکا ټیکساس ایالت یو زندان کې ده.صدیقي چې په نیورو ساینس کې یې د امریکا له یو معتبر پوهنتون څخه د ډاکټرۍ سند اخیستی، په زندان کې بیلابیل ډول ربړول شوې ده.
وکیل یې کلایو سټفورډ ویلي چې امریکایانو پرې زندان کې جنسي تیری هم کړی دی.د صدیقي د خوشې کیدو ځینې هڅې هم شوي دي.
ویل کیږي طالبانو له امریکا څخه د نوموړې د خوشې کیدو او تبادلې غوښتنه کړې وه، چې امریکایانو رد کړې وه.
سناتور مشتاق احمد خان ویلي چې د عافیې د خوشې کولو د هڅو د چټکتیا او په نړیواله کچه د دې مسلې د بیا راپورته کولو له پاره به له اختر وروسته امریکا ته ولاړ شي.
