په بېشکېک کې د افغانستان سرپرست سفیر، مولوي عبدالشکور حقاني په کوربه هېواد کې د هند له سفیر بیرېندر سېنګ سره کتلي.
قرغزستان کې د افغانستان سفارت وایي، دې کتنه کې د دواړو هېوادونو ترمنځ د سیاسي، اقتصادي او سوداګريزو اړيکو پر پراختیا خبرې شوي.
دواړه لوري دغه راز د ویزو پر اسانتیاوو، روغتیا، سیاحت، پانګونې او د بشري همکاریو په ګډون پر بېلابېلو موضوعاتو غږېدلي دي.
سرچینه زیاتوي، چې دې کتنه کې د کابل او نوي ډیلي ترمنځ د متقابل باور پر پیاوړتیا او د ګډو همکاریو پر پراختیا هم ټینګار شوی دی.