له کابله خپرېدونکې ورځپاڼې(مسیر) په خپله نننۍ سرلیکنه کې د افغانستان او هندوستان د اړیکو په ټپه درېدو په تړاو بحث کړی دی. یادې ورځپاڼې لیکلي، افغانستان کې له وروستیو سیاسي بدلونو وروسته، له هندوستان سره سیاسي او اقتصادي اړیکې تقریباً په ټپه ولاړې دي.: «دا حالت په داسې حال کې دی چې د دواړو هېوادونو تر منځ تېرو لسیزو کې ښې او د اعتماد وړ اړیکې موجودې وې. اوس مهال، افغان سرپرست حکومت له ټولې نړۍ، په ځانگړې توگه له گاونډیانو او هند سره رسمي اړیکې او تعاملات رغولو ته ډیر لېوال دی.»
د سرلیکنې له مخې، د افغانستان او هندوستان اړیکې تل د سیمهییز ثبات او پرمختگ لپاره مهمې بلل شوي دي. هندوستان د سیمې یو ځواکمن اقتصادي او سیاسي هېواد دی او له افغانستان سره ښې اړیکې د دواړو هېوادونو په گټه دي. په تېرو دوه نیمو لسیزو کې، گڼو افغان ځوانانو په هندوستان کې زده کړې کړې او په لکونو نور افغانان هندوستان ته د درملنې لپاره تللي دي.: «د افغانستان نوی سرپرست حکومت دا هڅه کوي چې په نړیواله کچه خپل دریځ او مشروعیت ټینگ کړي. په دې برخه کې د هند ملاتړ او همکاري ډېره مهمه ده. افغانان هیله لري چې هندوستان به ژر تر ژره له افغانستان سره خپلې اړیکې له سره پیل کړي او د تېر په څېر به د افغانستان له سرپرست حکومت او ملت سره ملگرتیا وکړي، ترڅو گډې گټې او راکړې ورکړې بیا هم دوام ومومي.»
په سرلیکنه کې ویل شوي، له بلې خوا، هندوستان ته په کار ده چې د افغانستان اوسني وضعیت ته په کتو، خپل دریځ روښانه کړي او له نوي سرپرست حکومت سره په گډه کار وکړي. د افغانستان خلک او سرپرست حکومت دواړه دې ته چمتو دي چې له هند سره هر اړخیزې اړیکې ټینگې کړي. ځکه چې د افغانستان د پرمختگ او ثبات لپاره د نړیوالو همکاریو اړتیا شته او په دې لاره کې هندوستان کولای شي یو مهم رول ولوبوي.: «افغانان هیله لري چې هندوستان به د افغانستان په وړاندې خپلې پالیسۍ له سره وگوري او ژر تر ژره به له افغان سرپرست حکومت سره اړیکې بیا پيل کړي، ترڅو د دواړو هېوادونو تر منځ گډې گټې او راکړې ورکړې بیا هم فعاله شي او په دې توگه به د سیمې ثبات او پرمختگ هم تضمین کړي.»
په سرلیکنه کې له هندي حکومت غوښتل شوي، چې له افغانستان سره د اړیکو په پیاوړتیا له سره غور وکړي، چې دغه چاره د دواړو هېوادونو په گټه ده.: «په اوس حال کې د افغانستان او هندوستان اړیکې یو ځل بیا د بیا کتنې او پیاوړتیا په مرحله کې دي. دواړه هېوادونه کولای شي له دې فرصته په گټه اخیستنې سره د خپلو خلکو لپاره یو ښه راتلونکی رامنځته کړي. هندوستان ته په کار ده چې د افغانستان سره خپلې اړیکې بیا ورغوي او په گډه د سیمې په پرمختگ کې خپل رغنده رول ولوبوي.»