هندي رسنیو د خپلو ځایي چارواکو له قوله خبر ورکړی، چې د دغه هېواد لومړی وزیر “نرېندرا مودي” روسیې ته په سفر ځي.
هندي ورځپاڼې “دي ټریبیون” لیکلي چې د هند لومړی وزیر “نریندرا مودي” به د جولای پر ۸ مه روسیې ته سفر وکړي.
د ورځپاڼې د راپور له مخې، مسکو ته د مودي سفر به د ناټو له سرمشریزې وړاندې ترسره شي.
ټاکل شوې د ناټو سرمشریزه د جولای له نهمې تر ۱۱مې د امریکا په واشنګټن کې ترسره شي.
اخوا روسي رسنیو د کرملین ویاند “ډیمیټري پسکوف” له قوله ویلي، چې له روسي چارواکو سره به د نرېندرا مودي لیدنې ډېرې پراخه او مهمې وي.
د هند د لومړي وزیر په توګه د نریندا مودي د بیا ځل ټاکل کېدو وروسته دا لومړی ځل دی، چې روسیې ته سفر کوي.
د نرېندرا مودي او ولادیمیر پوتین تر منځ وروستۍ لیدنه د ۲۰۲۲ کال په سپټمبر میاشت په ازبکستان کې د شانګهای همکارۍ سازمان په سرمشریزه کې شوې وه.