د امریکا ولسمشر ډونالډ ټرمپ ویلي، چې پلان لري د دغه هېواد له پلازمېنې واشنګټن ډيسي ښار څخه بې کوره خلک وشړي.
نوموړي ویلي، چې دغه کسان به له پلازمېنې ډېر لرې په یوه بله سیمه کې مېشت کړل شي.
د نړیوالو رسنیو د راپورونو لهمخې، ټرمپ لهدې سربېره چې بې کوره خلکو ته یې له وشنګټن ډيسي د شړلو ګواښ کړی، پر جرمونو ککړ خلک یې هم پر زندان ګواښلي دي.
نوموړي ویلي: «اړتیا نشته چې مجرمین وتښتي، موږ به دوی زندان ته واستوو، هغه ځای چې دوی ورپورې اړه لري.»
ټرمپ دغه طرحه د سرحدي قوانینو له تطبیق سره تشبیه کړې او ادعا یې کړې، چې د ده په ولسمشرۍ امریکا ته کډوالي په تېرو میاشتو کې «صفر» ته راښکته شوې ده.